自駕遊保險點買好?

如果大家有去旅行玩開自駕遊,都應該買過保險以保障自身車輛安全及第三者責任。萬一在旅行途中有什麼交通意外,保險都可以作出保障。但係大家有冇諗過點樣買? 應該買啲乜嘢保障範圍? 同埋有啲乜嘢一定要買?

基本上去旅行自駕遊可以從下面兩種途徑購買保險保障自己及第三者:

1.香港旅遊保險中的自駕遊延展保障(一般都需要額外付款)

2.當地汽車保險及第三者責任保險,一般會由租車公司幫你安排

一般來說每個國家保險法同埋當地法例都有不同,所以上面第一個做法一般是比較少人用, 就算買左都係用黎補飛。萬一租車公司所提供嘅保險不夠全面,就可以由呢一份保險發揮作用, 提供保障, 例如自付額/ 墊底費 (Excess)。

而上面第二種保險就是大部分人都會購買或被要求去購買,一般來說係用嚟保障車輛自身因意外造成的破壞及第三者責任所造成的傷亡賠償。

但是一般嚟講都係需要自己承擔墊底費或自付額。一般墊底費為幾千蚊港元左右。

不過而家好多當地保險公司只需要加多少少錢就可以為自駕者提供埋自付額嘅保障。以日本嚟講,一日只需多畀100蚊港元,就算撞車爛到點都好,你一蚊都唔使畀。所以呢一個保障對於新手司機或者比較少喺香港渣車嘅司機嚟講係好重要。

噉你就可能會問: 係咪賣曬所有保險就好安全啦? 我會答你唔係,因為每份保險嘅用途都唔同,你要留意清楚份保險係提供乜嘢保障先好買。

以自駕遊為例,當地嘅租車公司保險就必須要買,另外你可以因應你自己嘅駕駛技術,而決定買唔買額外嘅墊底費保障。

至於香港嘅旅遊保險係可買可唔買,但係你自己需要自行衡量風險。如果你唔打算喺當地買墊底費嘅額外保障,你就可以用旅遊保險的保單度加購墊底費的保障,但係唔係間間保險公司都肯受保,價錢亦每間公司都有不同, 所以最好跟你嘅經紀去查詢同了解清楚。