陽江行之體驗: 碧桂園鳳凰酒店

好耐都冇去過大陸喇,今次因為工作關係而要出差去陽江, 順便睇睇而家內地嘅發展係如何。今次住宿主要揀咗兩間五星級酒店, 然後再二揀一,一間係叫做華邑酒店,另外一間叫做 碧桂園鳳凰酒店。由於前者好快已經訂購一空, 所以我就只可以揀碧桂園酒店, 呢個品牌相信大家都唔會陌生, 係香港都好出名,加上叫5星級, 所以都叫放心。

首先要同大家講一講,呢篇文章嘅評價係基於陽江市本身係屬於三四線城市, 而且的士絕對唔多,打滴滴車亦都唔容易嘅客觀因素而作出評論。

今次由香港去陽江市,去程係坐直通巴,由灣仔出發,中途經中環,然後再經深圳灣,再喺深圳灣轉車,經開平, 恩平,再到陽江, 再喺陽江雨田酒店轉車到碧桂園酒店。今次一共用咗九小時,實際時間其實只需要六小時,詳細原因及內容請參閱此文章

由雨田酒店坐的士只需要15分鐘就去到 碧桂園鳳凰酒店店, 由於喺街上一架的士都好難搵到,所以搵到一架的士,明知佢係坐地起價話唔跳標30蚊我都欣然接受。去到酒店已經係十点鐘左右。

碧桂園鳳凰酒店

入到酒店門口, 酒店夜景都幾靚。而酒店大堂都好大,只係辦理入住手續用咗好多分鐘,因爲我用香港信用卡,去到刷極都刷唔到卡,所以搞咗好耐先至入住到。

今次入住嘅係最高級嘅商務套房, 價錢$500蚊一晚 (查詢房價), 上到去六樓,喺走廊行緊嘅時候已經聞到大陣煙味喇. 估唔到入到房間, 都有有好大陣味, 好在有個露臺, 我即刻打開, 並且開行冷氣,希望散左d煙味,但係可能呢啲煙味已經日積已久,未能夠完全驅散。

零壓房

其他地方整整齊齊,都沒有太大問題,浴室有企缸同埋浴缸兩個選擇,而浴室用品亦都有齊,基本嘅沖涼液, 番梘,以及剃鬚刀全部都齊全,但係當然唔可以同國外嘅品質相比啦,呢個都係預料之內。

房間裏邊唔知點解擺左張要付錢嘅按摩椅,噉樣佢可以一日賺到幾多錢呢?

酒店另外亦都有一個usb插座, 可以畀大家手機充電,都叫做貼心,佢另外亦都有一個快速充電器,但係需要付費。所以最後都冇用到。

早上補拍

擺低行李之後即刻落去樓下睇下有啲乜嘢嘢可以食得因為坐咗九個鐘头嘅車,十分之肚餓喇。

落到酒店行咗十分鐘完全見唔到有食店。因為已經太攰喇唔想再行多,而且再行遠啲都未必有食店, 加上好多鋪頭都關門,所以最後揾到有一間生果店,入咗去買咗三隻大型香蕉,然後返酒店慢慢食。反正聽日朝早,酒店包埋早餐可以食返夠本。

早餐屬於自助餐形式, 落到酒店喺check in 枱面對面就會見到有間餐廳,你俾張房卡去嘟一嘟就入得去喇。


餐廳中式西式嘅嘢食都有西式有麵包,為主同埋有沙律,而中式有粉麵飯同埋粥,飲品方面有果汁亦都有奶茶咖啡,算係齊全。

基本要求唔高嘅人應該可以滿足到佢哋。食物嘅質素當然冇香港咁好。另外亦見到有壽司,但係你夠唔夠膽食先?

而酒店退房嘅時候我要求俾發票,佢竟然可以用十分鐘先整到張發票。後來跟內地嘅朋友瞭解過,原來係因為佢哋要有個稅務編碼,每張發票都要有個特定稅務號碼,以防有什麼貪腐的情況發生。

整體而言, 陽江係一個未開發三四線嘅地方,而酒店亦都係起呢個三四線嘅地方比較唔係咁近市區嘅位置。所以周邊的生活機能唔係十分之完善, 完全可以理解。

但係 碧桂園鳳凰酒店 嘅星級絕對沒有五星級這麼高,起我個人嘅眼中,佢祇有水.5星。所以如果你抱太大期望入到去就會有好大失望。

如果大家想交通方便小小,而且較為高質素嘅地方可以考慮去華邑酒店,因為我去會議嘅時候發覺,嗰度比較接近4-4.5星級嘅酒店,當然我個人沒有入住過, 個人嘅意見只作參考之用。

碧桂園陽江鳳凰酒店 (Yangjiang Phoenix Hotel)

地址: West Hubin Road (Hubin Xi Lu), 陽東, 陽江, 中國 

訂房: Agoda  |  Booking.com

Leave a Reply

Your email address will not be published. Required fields are marked *