港孩放電之旅: 丟丟噹親子樂園民宿 (宜蘭5星級民宿推薦)

去宜蘭當然要去丟丟噹啦! 講起民宿, 小編嘅經驗就係同airbnb差唔多, 通常都係一啲有特色嘅房間，例如有特大露臺，或者天臺泳池，但缺點係只會提供基本嘅住宿服務，唔會提供額外用品，例如牙刷、牙膏、洗頭水、護膚品及拖鞋等等。而且又冇服務可言。今次小編去宜蘭，因為帶住小朋友嘅關係, 想搵一間可以接觸到鄉郊地方, 於是係 google map 搵到呢間 丟丟噹 親子民宿。

一睇之下發現網上有唔錯嘅評價，並且有好多唔同嘅兒童設施, 可以俾小朋友玩足一日。對於港爸既我覺得應該係一個唔錯既體驗, 最重要既係呢啲設施香港亦都搵唔到。

而且室內外都有野玩, 落雨都唔驚，進可攻退可守，小編喺噉嘅情況之下，就膽粗粗訂了一晚嘅住宿。

當我上的士由宜蘭晶英酒店搭去 丟丟噹 親子民宿 嘅時候，沿途見到有不少綠油油嘅稻草田, 好有周杰倫稻香mv嘅feel。

我哋一行三人12點半左右到達, 一落車就即刻有位帶有親切笑容既員工幫我哋攞行李，並告知正在打掃, 要等到三點鐘先可以辦入住手續。

員工之後介紹我哋去佢哋當地嘅親子餐廳。每位大人只需叫一杯嘢飲或一個單點食品，就可以話坐足成日，小朋友亦都係可以免費去佢哋嘅室內遊樂園任玩。

由於阿仔開始眼瞓，並且想瞓晏覺，所以我哋就叫的士司機帶我哋去員工所講嘅親子餐廳，食少少嘢同玩一陣再返返嚟喇。

由民宿去到餐廳都只係十分鐘, 都算方便。依間餐廳亦都係一個宜蘭必玩推介嘅地方，因為真係好多嘢玩。(詳情請參考這裡)

返到去民宿已經見到有啲人喺度登記入住喇, 全部都係一家大細。當做完入住手續之後，老闆林小姐同員工就好專業同埋好親切噉因為我哋介紹每一個設施同埋地方，並且幫我哋攞行李上去我哋嘅房間。

老闆話依度開左業大概3年，大多數既客人都係香港人。同埋民宿老闆十分注意個人衛生，佢會要求每位客人入屋前先換鞋，並著上佢哋提供嘅拖鞋，所以見到個地下係一塵不染，十分之放心小朋友喺呢度玩，就算訓係度玩都唔驚。

員工亦問我哋想於三點半還是四點半進食(免費)下午茶餐，我哋就揀咗三點半，食完然後再去玩水。

我哋今次入住嘅房間喺四樓，仲以為要行樓梯，點知員工話畀我哋聽有lift，十分之方便同先進，比我想像中嘅民宿好唔同。

每一層都有得玩籃球架, 喺呢個民宿嘅任何一個地方都係有得玩嘅, 畀小朋友放電就一流喇。

今次入住403號房間，入到間房一打開道門，就見到小朋友床係一個跑車車身嘅形狀，最啱男仔喇，阿仔見到都好鍾意，即刻訓上去試下舒唔舒服添。

而大人牀就係基本嘅雙人床，天花有一盞射燈喺床單上射出一朵玫瑰花, 令白色嘅床單加上浪漫點綴。

至於洗手間方便，民宿老闆一啲都唔吝嗇，採用日本電子馬桶，可以用嚟洗pat pat，民宿界中實為罕見。

而大人同小朋友嘅梳洗用具都十分之齊備。

室中亦有企浴同浴缸，浴缸更加夢幻，粉紅色，晚上可以一家人浸下浴。

民宿更有一個露台，比大家走出去觀看宜蘭美麗既一面。

由於當天陽光好好，同前一日唔同，我哋即刻落去樓下食埋個下午茶就去跳落水玩啊。

下午茶味道唔錯，甜品最啱小朋友，大人亦都有紫米露消下暑!

首先小朋友去咗玩一陣沙，然後見熱就即刻同我一齊跳落水玩喇，一跳落水就即刻發覺好凍，一問老闆娘之下原來呢個唔係普通嘅泳池，佢係所謂嘅 “冷溫泉”。

依家民宿嘅所有水都係來自冷溫泉，泉水介乎20度，無論冬天、夏天四季都係長期20度。難怪池水咁清澈，而且亦都冇游泳池嘅綠化氣味，對小朋友游水十分之安全，飲到都唔驚。水上泳池”玩具” 充足，連近年流行的滾輪式超大充氣泳圏都有!

大人都唔會覺得悶, 因為有其它活動都啱大人玩，例如喺湖上面蛙艇，同埋釣魚，嗯呢啲都係好適合一家大細玩嘅活動。

游完水之後跟住我哋再玩埋個透明滑梯，它有成1層樓咁高, 小朋友玩得好開心，同埋佢都有三個打千秋座位, 你可以望住綠油油嘅稻田，一路打千秋，一路呼吸住新鮮嘅空氣，享受住親子時光。

另外呢度仲有兒童小火車玩，但係因為時間唔夠，所以冇玩到喇。

之後我哋搭的士去咗附近嘅夜市，返嚟之後，見到成個景象都唔同曬, 原來夜晚民宿會開住燈光，成個件仲浪漫曬。

番到民宿，同民宿員工傾開偈，原來呢度仲有幾款唔同嘅房型，其中有一款房型係有天窗，夜晚可以睇到星星同埋螢火蟲。咁我再問下可唔可以畀我哋入去參觀下，員工好客氣咁樣帶我哋上去參觀咗幾間唔同嘅房型 (下圖)。完全唔會有不耐煩嘅感覺。

早上嘅早餐亦都十分豐富, 雖然唔係酒店嘅自助餐，但係種類繁多，好有本土鄉情嘅味道，每一件嘅嘢食，我都將佢食曬。而且飲品都好齊全，有唔同嘅果汁同埋咖啡機。

食完早餐跟住起早餐位置附近有個室內兒童遊樂場, 阿仔又同其他小朋友玩咗一陣。

跟住阿仔仲話想去遊多次水，可惜我哋要趕住時間去其他景點遊覽。冇機會再玩其他設施。所以入住2晚會有充足既時間玩晒所有設施。

臨走嘅時候，丟丟噹 老闆娘仲好好人送左件玩具俾阿仔，仲幫我哋叫埋車，並且送埋我哋出去搭的士, 等到我哋上咗的士先肯走, 呢份鄉土嘅人情，十分之難得。

丟丟噹親子樂園民宿

地址: 宜蘭縣冬山鄉水井二路35號

官方網站: http://www.diudiudang.tw/