2020 台灣投資移民 新制度 – 技術分析

台灣投審會於3月5日推出左新既 台灣投資移民 規定, 如果你既移民公司仲未同你講解最新嘅情況,噉你就要自己小心喇。事關今次嘅方案其實係想杜絕一啲 “假投資,真移民” 嘅香港人。

首先講一講今次嘅台灣投資移民嘅方案背景以及有乜嘢唔同嘅地方,然後再為大家作出深入嘅分析。

相信大家喺2019年都知道香港發生咗好多社會事件,導致有唔少香港人申請投資移民臺灣,但係由於本身台灣嘅投資移民比起其他國家嚟講相當之寬鬆,投資嘅基本金額只需要600萬臺币,住滿一年就得,因此有唔少人都話自己做代購,開網店,基本上連人都唔需要請,就係噉自己去開一間公司然後做盤數出嚟,一年之後就拍拍籮柚又將間公司結業,然後將啲資金擺返落自己袋度,(當然背後有一啲純粹為咗賺錢嘅移民公司喺背後教路) 。

基本上好多香港人都係咁做, 就係對臺灣以及臺灣嘅市民沒有作出過任何嘅貢獻。有見及此臺灣投審會就加強改善現時嘅漏洞,變更如下:

  1. 投資經營需持續三年以上
  2. 每年需提供”經會計師查核簽證之財務報表”給投審會備查
  3. 如不符要求,將撤銷其投資許可(繼而失去居留/定居資格)
  4. 新公司需至少請兩位本地員工
  5. 申請人需要聲明確實實行計畫書以及達到預期嘅成效

相信睇完上邊幾項嘅新要求,好多人都有好多疑問,例如請兩個人可唔可以係兼職員工?如果喺三年內中途已經輸曬啲錢噉點算好?係唔係都要蝕住錢嚟做?點樣先叫做確實如果達唔到預期嘅數噉會唔會唔批身份證?下邊為大家逐一分析。

有網民在台灣投資移民group發問如何在3年內公司營運唔太蝕錢

1.投資經營需持續三年以上

投資嘅營業需要持續三年以上噉係咪即係代表1年嘅居留,要延長到三年呢?答案當然唔係啦!當你完成咗第一年嘅居留又唔離開臺灣超過30日,你就可以通過投審會嘅審批並且取得身份證,但係如果你喺跟住嗰兩年結束咗公司嘅業務,投審會有權取消你嘅居留或者定居資格。

噉點樣可以確保我喺三年內嘅營業額唔會有負數出現或者起碼令到我可以維持到生計?其實呢個就係問題中嘅重點中嘅重點, 相比起其他嘅要求係更加重要。

點解?小編相信因為有太多香港人你呢幾年去咗臺灣一年攞咗個身份證然後就返返香港打工,噉樣同時間享有香港政府以及臺灣政府嘅福利,但係對於臺灣完全沒有任何實質貢獻,所以要將這個機制改為三年等大家可以真真正正喺臺灣經營一盤真正生意, 而唔係求其請個會計然後玩下數字遊戲, 就可以成功申請 台灣投資移民。

所以首先你要問一問自己你係咪真係想去臺灣移民,並且喺嗰度落地生根過埋剩返落嚟嘅生活。定抑或係你自己其實心裏面另有目的想攞人哋著數?

如果你係屬於前者嘅話其實你根本唔需要擔心之後嗰啲要求,衹要做好風險管理同埋有曬全盤計畫唔係諗住走去買串魚蛋跟住就叫做做生意的話,就算真係日日0生意最多蝕嘅都係預咗嗰600萬,當然要預夠數畀三年洗費喇!例如大家最關心嘅兩個員工要求,其實占你嘅投資額唔係話好多,大概三分一左右。下面詳細講解呢一方面嘅要求。

但係如果你真係屬於後者的話本人唔建議你繼續考慮臺灣因為其他地方同樣價錢,做法更加風險低。

2.每年需提供”經會計師查核簽證之財務報表”給投審會備查

相信呢一個要求係比其他要求簡單好多,而且最容易實行。純粹畀會計去搞就得喇,當然你揀會計都要有技巧啦,唔係貪個平字就得,因為呢個會計可以幫到你攞到移民,嘅居留權同埋成為臺灣人。呢啲錢絕對唔可以慳嘅應使得使。

–>西門町民宿推介 – 台北住宿攻略

3.如不符要求,將撤銷其投資許可(繼而失去居留/定居資格)

如果有移民公司仲同你講下一年可以好簡單噉樣攞到個身份證然後跟手結束營業,記住唔好信佢, 又或者佢哋有一啲業務可以投資一年然後你就可以退股,都唔好咁輕易相信佢哋,因為而家投資移民公司講嘅嘢未必能反映到事實喇。

有移民公司在出政策後即刻開班講應對方案

起碼要半信半疑先唔好信曬佢哋,始終個制度都改咗,佢哋又未有起改制之後成功嘅先例,要等一年後先至知道個結果,佢哋雖然話識得投審會裏面的人,但唔代表咁樣就可以橫行天下。所以呢度建議大家儘量所有嘢都親力親為,表格儘量自己去填,填完再俾專業人士去改再幫你去遞交。

4.新公司需至少請兩位本地員工

點解喺上面第三個點叫大家唔好咁易信移民公司呢因為多呢個新方案出咗之後,又唔少移民公司都立即起佢哋嘅網站或者貼文教導大家走下歪路,就可以懶懶行唔使理,成功移民。而小編相信有好多移民公司為咗佢哋嘅客戶放心呢個兩位員工嘅要求,都會自製唔同嘅標準答案。

舉個例子見到A移民公司係投審會公佈咗200嘅,新規定後佢哋即刻喺網上邊寫左一對佢哋嘅見解又話自己問過投審會經過解釋之後就話嗰兩位員工可以係兼職。但係同時間我又見到另外有一間 B移民公司寫到明,一定要全職唔可以兼職,否則就唔會可以獲得批准。並且好有理據咁講話投審會主要係睇下佢哋對臺灣作出幾多貢獻。

以上兩個例子純粹係想講畀大家聽唔同嘅移民公司有唔同嘅演繹,加上投審會官方網站並沒有寫到可唔可以允許兩名員工係兼職或者全職,所以到時唔得嘅話就口同鼻詏。所以都係個句自己衡量風險再作決定。

5.申請人需要聲明確實實行計畫書以及達到預期嘅成效

其實呢一點都幾令人擔心因為如果到時個盤數做唔到預期嘅計畫嘅乘客,係咪真係話唔可以申請到居留權又或者係咪要將個審批現場拖一年?始終做生意邊有一定話會賺錢,仲要喺臺灣。加上有大部分投資移民嘅人都係第一次做生意人生路不熟又唔瞭解臺灣嘅市場,點樣可以喺臺灣掘到第一桶金呢?

個人猜測因為之前有好多香港人寫個盤數天花龍鳳賺好多錢,但係實際上去到尾其實一文都冇賺過。所以係新嘅規定之下寫出申請人需要如實地實行,並聲明要達到預期效果。

其實投審會最後會睇下大家係咪真係有努力噉樣去做過,當然佢哋亦都有自己方法,始終人哋經歷過無數次畀香港人欺騙,已經累積到好多經驗,加上移民公司教導的招數離去去都係嗰幾個玩法,相信捉佢哋蠱惑唔會話太難。因此小編個人嘅睇法就係盡力去做啦,真係當佢係一個自己嘅寶貝。

以上純粹筆者個人意見, 歡迎分享。

–> 自行申請移民台灣教學 (香港人/澳門人專用)

3 thoughts on “2020 台灣投資移民 新制度 – 技術分析

Comments are closed.