[紅樓霸王鴨] 比北京填鴨好味百倍 +抵食嘅櫻桃鴨 | 食過返唔到轉頭

今次去宜蘭出入都搭的士,每次同司機傾偈,都講下宜蘭嘅地道美食,個個的士司機都推介櫻桃鴨,而喺咁多間餐廳之中,佢哋都異口同聲噉講紅樓嘅 櫻桃霸王鴨 係最好食。

有見及此,小編一定要親自品嚐一下傳說中嘅紅樓 櫻桃鴨 係咪真係咁好味。未食之前小編覺得應該同香港嘅北京樓差唔多水準, 始終都係一隻鴨,可以有幾大分別?於是透過佢哋網頁訂咗位, 好快收到佢哋嘅電郵確認信。

之前已經問過司機點解櫻桃鴨用櫻桃命名,佢哋嘅解釋就係,因為呢啲鴨平時係食開有機飼料,所以佢哋煮出嚟之後,鴨嘅肉身係呈現櫻桃色。

我訂嘅係晚上七點半晚餐, 餐廳係位於宜蘭晶英酒店裏邊, 去到餐廳嘅時候,裝潢果然有氣勢,而且睇落去好有規模,有傳統嘅中國色彩。

地方亦都好闊落, 唔似香港嘅茶樓噉,枱黐枱,凳黐凳,坐落個環境都都幾舒服。可能主要係因為喺五星級酒店裏邊,經營唔可以太過馬虎。

等了唔使一分鐘, 餐廳員工就招呼我哋入去, 並且問我哋飲乜嘢茶, 老婆仔唔使諗之下就揀咗烏龍茶。

至於餐牌喺電郵上邊已經attach左畀我哋睇過,所以去到即刻可以落柯打。4人餐價錢為台幣4,500元, 計番都係$1000港元, 平時去美心中菜食個晚餐都要依個價錢, 以5星級酒店黎講好抵食。

星期六、日祇有套餐,星期一至五就可以散叫,由於我去到嗰日係星期日,所以我哋一家三口只可以揀套餐 – 四人餐。

首先上茶同頭盤小食, 小食都有9碟咁多, 仲要大大碟!

烏龍茶 – 烏龍茶下邊有蠟燭熱住,所以茶唔會好快凍, 飲落去茶香溫潤香醇, 十分清香

9小碟前菜: 包括有梅汁番茄、冰糖荸薺、蜂蜜南瓜、沙律蘆筍、蒜香海踅頭等等。

之後就上梅子醋飲, 酸酸甜甜, 可以無限添加, 好解油膩。食完每道菜飲一啖可以清下個口,又可以醒下個胃,唔會咁滯。

跟住就係上主菜, 今次主廚同隻鴨都同時出場, 十分認真:

主廚手起刀落,好快就切完仕隻 櫻桃鴨

主廚及店員哥哥一旁忙著切 櫻桃鴨 同解說, 每道菜式都講解詳細, 可見店員哥哥完全了解菜式內容同味道, 同香港既服務員態度好唔同。

櫻桃鴨握壽司 – 鴨皮鎖住鴨油, 香脆度超高, 成塊薯片咁, 而且又冇肥膏, 可以見得師傅刀功之高, 鴨皮同壽司飯配合得天衣無縫, 創意十足, 反觀香港北京樓最多只有一鴨兩食,幾十年都冇進步~

三星蔥皮

三星蔥鴨捲 + 紅樓特製蔥油餅 –  捲餅分別用三星蔥做的(綠色)餅皮同蔥油餅的餅皮, 兩種皮都皮薄唔滯, 同香港食開果塊飽滯既粉皮有天源之別。

食到三星蔥香味既同時, 又中和左櫻桃鴨既油分。食完之後唔會再食香港果d北京填鴨, 真係番唔到轉頭。

生菜包鴨絲 – 鴨肉絲切成條狀,與豆芽、蘋果拌炒及新鮮萵苣,口感好清新, 加上生菜剪得很細膩, 每塊大細一樣。真正做到色香味俱全。

時令海鮮 – 鮑魚十分爽口彈牙,並且幫我地一開四,細細啖咁品嚐個鮮味!

香滷鴨小拼 (鴨舌鴨腳鴨翼鴨尖) – 特製醬汁整得好入味同野味, 仲帶點微辣鹹香, 必食推介!

櫻桃鴨鴨身 – 主廚特登切完留番隻鴨身出黎比大家食,鐘意”損”骨既人一定要試下~

水蓮 – 清滾完的水蓮淋上適量算容+鴨油, 食落去一般

油爆鮮蝦 – 不油, 蝦肉爽口, 而且見到有用少少粗鹽調味, 建議用快子食, 咁先食到蝦殼上鹹甜味

慢火白菜煲鴨湯 – 小編係一個鐘意飲湯既男人, 依個湯好足料,有白菜, 有西蘭花,有好多鴨肉,而且湯係奶白色,店員哥哥話熬咗12個鐘, 所以咁入味。

第一啖飲落去就知道係真材實料。重點係個湯濃醇不油膩, 一飲停唔到落黎, 老婆同我處於9成飽既狀況下都各自飲左三大碗。

正!

醬汁 – 要提一提依個包蔥油餅既醬汁, 雖然係唔起眼角色, 但起了好重要作用。個汁調較得十分之正宗,同香港嘅北京填鴨嘅醬汁好唔同,完全冇令人滯嘅感覺。

芋頭西米露 – 足料,唔溜, 而且好重新鮮嘅芋頭味。

d色水好靚, 而且飲落去好依奶咁滑。最後又飲左兩大碗。

以依個價錢可以食到咁高水準既鴨宴, 真係令人好難忘, 紅樓霸王鴨 亦都係我地一家係宜蘭食過最好既一家餐廳! 可惜分量太多食唔晒,如果星期六、日都可以單點就好啦。

紅樓

地址: 宜蘭市民權路二段36號6樓

訂枱連結: https://www.silksplace-yilan.com.tw/n/food_booking.html

訂位專線:(03)910-1011


留意: 每週六、日及特殊節日僅提供精選特餐服務

One thought on “[紅樓霸王鴨] 比北京填鴨好味百倍 +抵食嘅櫻桃鴨 | 食過返唔到轉頭

Leave a Reply

Your email address will not be published. Required fields are marked *